Album: NAWAZISH<br />Lyrics: DR. NAWAZ DEOBANDI<br />Singer: POORVA GURU<br />Music: NAJMUDDIN JAVED<br />Song : ROKE HUM DOSTON<br />Label: AUDIO CURRY<br /><br />Facebook Link : https://www.facebook.com/audiocurry<br /><br />Nawaz Deobandi ki chaar ghazlen…kuch paigham ke saath<br />Posted November 22, 2011 by vahshatedil in Urdu poetry. 9 Comments<br />Ek taveel arrse se maine yahan kuch sher-o-shayari par aap ke nazar kuch nahi rakha, jab ke aisa karna is muhim ka ek ahm maqsad tha. Jo bhi majbooriyan thi main unhe aap ke saamne rakhna theek na samajhta hoon… sirf mazraat ki hi iltija kar sakta hoon.<br />Berhaal, ab se, Insh’Allah, meri yeh hi koshish hogi ke aindaah aap sab ko shikayat ka mauqa na pesh ho.<br />Khair ab mudde pe aaye…. Pichle kuch dinon meri zehn mein ek awaaz gunj rahi thi, ek khaaskar buland awaaz jo zindagi ke mukhtalif aur pechida jazbaaton aur kashmakashon ko bemisaal lafzaat mein jodne mein maahir hai…. yeh awaaz hai Janaab Doctor Nawaz Deobandi ki, jin ka ta’aruf aap kai martaba yahan kar chuke honge…..<br />To lijiye, izzat-maab khwatin-o-hazrat, aapke liye Nawaz sahab ki kuch ghazlen… Mumkin hai, aap mein se kai inko pehle se jaante honge ya tahi dekhi hongi, lekin tab hi shayad jab aap is baar in he padhe, to aapko tab hi itna hi lutf aayega jab aap ne pehle padha ya suna ho.<br />Aur jinke ke liye yeh Doctor sahab se pehli mulaqaat hai, to in se achcha kya ta’aruf ho sakta hai….. Ek baat aur, isi chahen nasihat maane, chahen mashvara, lekin aap jaise in he padhen, ho sake to apne liye hi inhe tarannum mein padhne ki koshish kare….. Isi mein inka jaado hai! Afsos, main is andaaz mein pesh nahi kar sakta hoon aur aapko khud hi tassavur karna padhega….<br />Chaliye, pehli ghazal aap ke nazar hai. Choti behr ki ghazal hai, lekin bade mudde cherhti hai….. Khair, aap khud hi dekhen.<br /><br />Jo safar ikhtiyar karte hai<br />Voh hi darya ko paar karte hai<br />Sach to yeh hai ke khud musafir ka<br />Raaste intezaar karte hai<br />Un se bichde to phir huya mahsoos<br />Voh hamen kitna pyaar karte hai<br />Ham to apnon se kha gaye dhokha<br />Aap ko hoshiyar karte hai<br />Jhoothe vaadeh kiya na kar ham se<br />Ham tera aitbaar karte hai<br />Ham to us dil Nawaz dushman ko<br />Doston mein shumaar karte hai<br /><br />Ek aur dekhiye…… aakhri sher par tawajju chahunga.<br /><br />Jashn-e-gham-hayat manane nahi diya<br />Is muflisi ne zahar bhi khaane nahi diya<br />Ham ne jo sada lohi mein khaya koi fareb<br />Phir voh fareb auron ko khaane nahi diya<br />Aandhi ne roshni ki himayat to ki bahut<br />Lekin koi chiraagh jalaane nahi diya<br />Ek adh ghar to jal gaya par shahr bach gaya<br />Ab ke diye ka saath hawaa ne nahi diya<br />Raazi tha main bhi aur mera dushman bhi sulah par<br />Kuch doston ne haath milaane nahi diya<br /><br />Aur yeh bhi dekhiye….<br /><br />Maani na aql ki dil-e-nadaan ke saamne<br />Ek ghar bana liya dar-e-janaan ke saamne<br />Voh sirf rahzaanon hi pe ilzaam kyon rakhe<br />Jo lut gaya ho apne nigehbaan ke saamne<br />To mubtala ho ishq mein to phir pata chale<br />Khushiyan haqeer hai gham-e-janaan ke saamne<br />Rehne ko ghar na khaane ko roti na koi dost<br />Itni bhi mushkilen na ho insaan ke saamne<br />Faqa kashi mein khush hoon magar itna to de mujhe<br />Sharmindgi na ho kisi mehmaan ke saamne<br />Aur aakhir mein, jiska matla hi khudi ka ek naara hai….. aur phir <br /><br />aakhri do sher par aapki khaas tawajju ki iltija karunga.<br /><br />Yeh baar-e-falak ham ne zameen par nahi rakha<br />Thak kar kisi kandhe pe kabhi sar nahi rakha<br />Is ne bhi hawaaon ke abhi rukh nahi badle<br />Main ne bhi chiraaghon ko bujha kar nahi rakha<br />Main ne bhi ise khar se tasbeeh nahi di<br />Is ne bhi mera naam gul-e-tarr nahi rakha<br />Kyun thokre lagti hai ke jab ham ne kabhi bhi<br />Raaste mein kisi ke koi patthar nahi rakha<br />Tareekh se vaaqif hai jo, bete ka inhone<br />Rakha hai Ali naam, Sikandar nahi rakha
